Siúlach Scéalach le Sharon Ní Chonchúir
Tá Féile Rós Thráighlí ar siúl
faoi láthair. Roimhe seo, cheapas gur ábhar magaidh a bhi
ins an bhféile seo leithscéal cailíní álainne
a chur ar an dteilifís agus stánadh orthu gan náire.
Ach tar éis dom bualadh le Rós 2005 Aoibhinn Ni Shúilleabháin
agus Rós Chiarraí na bliana seo, Colleen Shannon, tá
athrú tagtha ar m'aigne. Anois ceapaim gur iontach agus spéisiúil
an féile í Féile Ros Thráighlí.
Conas ar thárla an t-athrú croí seo? Bhuel, sí
Aoibhínn Ni Shúilleabháin a chur tús leis.
Cailín álainn is ea í gan dabht ar bith ach is cailín
eirimiúil, nádúrtha í freisin.
Bhain sí súp as a bhliain mar Rós Thráighlí.
"Bliain iontach a bhi ann," adeir sí. "Thárla
rud éigin deifriúil, nua nó suntasach gach aon lá.
Cuimhneoidh mé ar an bhliain seo go deo na ndeor."
Thóg sí bliain saor chun tairbhe iomlán a bhaint
as. "Bhí an t-ádh liom mar bhí mé díreach
tar éis mo chéim eolaíochta a bhaint amach agus bhí
mé in ann bliain saor a thógaint," arsa Aoibhínn.
"De ghnáth, ní bhíonn an rogha sin ag Rósanna.
Bionn orthu leanúint ar aghaidh ag obair."
Siad na rudaí a rinne sí i rith na bliana is cúis
le m'athrú aigne. Ar dtúis, chur sí aithne ar an
naonúr agus fiche Rós eile. "Cailíní
gleoite is ea gach aon duine acu," adeir sí. "Beidh siad
mar cáirde buan agam as seo amach."
Is maith an rud é cáirde a dhéanamh, go mórmhór
cáirde a bheidh buan seasmhach go deo. Ach ní hé
seo is mó a chuaigh i bhfeidhm orm. Ní hé seo is
cúis le m'athrú meoin.
Gach bliain, tugtar ¤25,000 do Rós Thráighlí
agus baineann sí úsáid as chun taisteal mórthímpeall
an domhain. Sin a rinne Aoibhínn. Siad na ceachtanna a d'fhoghlaim
sí mar thoradh ar an dtaisteal seo an rud is suntasaí mar
gheall ar a bhliain mar Rós, dar liom.
"Chicago, Darwin, LA, an Ind, Dubai, Dún Éideann, Brisbane,
Cheltenham... is liosta fada é liosta na h-áiteanna ar thug
mé turas orthu," arsa Aoibhínn. "Bhi mé
ag taisteal ar feadh ceithre mhí agus casadh daoine iontacha orm."
Thug sí cuairt ar ana chuid pobail Éireannacha thar lear
— ins an Bhreatain, i Meiriceá, ins an Astráil agus
ar fuaid na hEorapa. "Chuir an méid a bhi ar siúl ins
na pobail seo iontas agus áthas orm" adeir sí. "Ní
raibh a fhios agam go raibh Éireannaigh thar lear chomh fuinniúil
agus chomh gnóthach is atá."
Tar éis di turas a thabhairt ar na pobail seo, creideann sí
go bhfuil tábhacht faoi leith ag baint le Féile Rós
Thráighlí. "Is nasc í an féile idir na
pobail seo go léir," arsa Aoibhínn. "Is siombal
í an féile — siombal ana thábhachtach d'Éireannaigh
atá ina gcónaí i bhfad i gcéin. Ni thuigeann
mórán Éireannaigh (iadsan atá ina gconaí
ag abaile) é seo."
Cinnte, níor thuig mise é. Ach anois go bhfuil sé
ar eolas agam, ceapaim gur luachmhar an féile í Féile
an Rós agus go mba chóir gach iarracht a dhéanamh
í a chaomhnú amach anseo.
Tá deireadh tagtha le bliain Aoibhinn anois agus tá coróin
an Róis á chaitheamh ag cailin eile. (Bhi orm é seo
a scriobh roimh toradh an fhéile).
Níl a fhios agam cé a bhuadhfaidh mar sin, tá mé
dóchasach go mbuafaidh Rós Chiarraí — Colleen
Shannon. Casadh Colleen orm seachtain ó shin agus caithfidh mé
a rá gur bhain mé taithneamh as bualadh leí.
Is as Cill Áirne do Colleen agus tá sí ag staidéar
i dTráighlí. Nuair a bhí mé ag caint leí,
níor chreid sí fós gur roghnaíodh í
mar Rós Chiarraí.
"Is cuimhin liom bheith ag faire ar na Rósanna ar an dteilifís
agus mé i mo leanbh óg," arsa Colleen. "Ní
chreidim go mbeidh mise ina n-áit sara fada. Caithfidh gur brionglóid
é."
Nuair a labhair mé leí, bhí Colleen ag súil
go mór leis an bhféile. "Táim chun taithneamh
a bhaint as gach aon neomad," adeir sí. "Táim
ag súil le bualadh le na cailíní eile. Teastaíonn
uaim amhrán a chanadh ar an dteilifís. Tá gúna
aoibhinn agam agus beidh mé chomh sásta é a chaitheamh
ar stáitse. Siad na rudaí beaga is mó a bhainfidh
mé taithneamh astu is dóigh liom."
Tá súil agam gur éirigh thar barr le Colleen agus
gur bhain si a oiread sult as an bhféile agus ab fhéidir
leí.
Agus, pé hí an chailín a roghnaíodh mar Rós
na bliana seo, guím bliain eisceachtúil, spéisiúil,
ceolmhar uirthi.
Nach iontach an féile í féile an Rós?
|
